محتويات العلبة :
- تابلت Matepad T 10s
- الشاحن الـ10 وات
- دبوس فتح درج شرائح الإتصال
- وصلة الشحن الـUSB Type C
- دليل المُشغل السريع
- كارت الضمان
التصميم :-
الجهاز مصنوع من المعدن ولكن في جزء جنب الكاميرا كده من البلاستيك البولي كاربونيت
وزن التابلت حوالي 450 جرام ودا الوزن الطبيعي للتابلت وزن التابلت حوالي 450 جرام
تخانته صغيره أقل من 8 ملم وديه حاجة حلوة وكمان أطراف التابلت كلها محنية علشان تعرف تمسك التابلت بسهولة وأكيد هتمسكه بإيدك الأتنين مينفعش ايد واحدة خالص.
لو مسكت التابلت في وضع الـPortrait هتلاقي عندك الطرف العلوي فيه Speaker والطرف السفلي فيه Speaker تاني لإنه فيه صوت Stereo .. وتحت برده في منفذ الشحن الـType C ومدخل السماعات الـ3.5 مللي ومكان درج شرائح الإتصال اللي بياخد شريحة اتصال وكارت ميموري.
على اليمين هنلاقي أزرار التحكم في الصوت .. تحتيها زرار الباور وتحتهم في 2 ميكروفون .. وعلى الشمال مفيش اي حاجة.
الشاشة:
شاشة IPS LCD بحجم 10.1 بوصة بدقة FHD+ بكثافة بيكسلات 224 بيكسل لكل بوصة.
حواف الجهاز كبير بيس دي معمولة عشا ماتدوسش علي الشاشة بالغلط
شاشة عادية تناسب الفرجة على الفيديوهات .. تصفح مواقع وسوشيال وكده .. الألوان بتاعت الشاشة مش مشبعة اوي
الـDark Mode موجود وشغال كويس جدًا بس الإسود مش بيبقا أسود صريح أوي يعني .. وطبعا لو عاوز تقرأ مقالة طويلة او كتاب مثلا وضع الـ E-Book هنا هيريح عينك جدا لإنه بيقلب الشاشة ابيض واسود وبيريح عينك وكمان بيوفر في البطارية.
مفيش إعلان رسمي عن طبقة الحماية ومفيش سكرينة عليه
الأداء :-
التابلت بيجي بمعالج معالج Kirin 710 بمعمارية 14 نانو معالج اقتصادي أداءه معقول في الإستخدام البسيط اليومي العادي.
لكن لو قرصت عليه أوي مش هتاخد منه أداء قوي .. هتلاقي شوية تأخير بسيط ساعات في فتح البرامج لو في برامج كتير مفتوحة في الخلفية خصوصا أنه جاي بـ3 جيجا رام بس.
هتقولي المعالج ده وحش أوي على تابلت بالسعر ده .. هقلك أصلًا الـTablets الموجودة بالسعر ده فيها معالجات أضعف من المعالج اللي مش عاجبك ده .. أو تقدر تزود الميزانية بتاعتك شوية وتشوف الـMatepad 10.4 بمعالج أقوى بحبه حلوين الكيرن 810.
الـMatepad T10s بيقدر يشغل ببجي على High HD .. وبيشغل كول اوف ديوتي على Medium .. ولكن في الحقيقة وانت بتلعب هتحس أن الألعاب التقيلة مش ناعمة اوي .. هتحس بـLag خفيف كده مثلًا وانت
بتتحرك يمين وشمال بسرعة .. هتحتاج أحيانا تنزل الجودة بتاعت الـGraphic علشان الـFrame Rate يزيد شوية ومتحسش بتقطيعة في الفريمات.
وعمومًا الأداء الرسومي هنا مناسب أكتر للألعاب الخفيفة والأطفال وعلشان كدا هتلاقي الـKids Corner البرنامج المفضل عندي اللي تقدر من خلاله تتحكم طفلك هيقدر يشغل ايه على التابلت والوقت كمان اللي هيقعد فيه على التابلت قد ايه علشان ننظم وقت اطفالنا شوية اللي تقريبًا كل يومهم بقى على تابلت أو موبايل.
عوامل الأمان وعناصر اخرى :-
التابلت هنا للأسف مفهوش اي عوامل امان ولا حتى Face Unlock .. اخرك تفتح التابلت عن طريق رقم سري .. وحقيقي مش عارف ليه ! التابلت جاي بأندرويد 10 على واجهة هواوي والإعتماد على خدمات هواوي والـApp Gallery.
التابلت هنا فيه لمبة إشعارات لإستغلال الحواف الكبيرة للشاشة وكويس جدًا انه فيه Notification LED انا بحبه بصراحه.
وفي Spilt Screen تقدر تقسم الشاشة العملاقة دي بين تطبيقين في نفس الوقت علشان تستغل الشاشة العملاقة.
التابلت بيدعم القلم بتاع هواوي ولكن مش بيجي معاه علشان يقدروا يقللوا من التكلفه بتاعته.
مستشعر الضوء موجود حقيقي وشغال كويس جدًا .. بس مفيش Gyroscope للأسف .. ومفيش مستشعر تقارب لإن مفيش سماعة مكالمات.
لما بيجيلك مكالمة الـSpeaker بيشتغل Automatic واللي حواليك هيسمعوا المكالمة أو ممكن تستخدم سماعة بلوتوث او بسلك عادي لان التابلت بيدعم مدخل 3.5 ملم .. وتعمل المكالمات اللي انت عايزها وكمان في 2 ميكروفون في التابلت علشان لو هتتكلم منه الصوت يكون مسموع للشخص اللي انت بتكلمه.
اما بالنسبة لصوت التابلت فهو Stereo بيخرج من سماعتين .. الصوت عالي وواضح والـBass محترم .. الـSound System من Harman Kardon زي ما متعودين من هواوي .. التجربة الصوتية هنا كويسة جدا جدا.
اما بالنسبة لشبكات الـWiFi والإتصال فهي مُمتازة الى اقصى درجة في التابلت ده.
البطارية :-
بطارية مش هقول ضخمة .. عادية بتيجي بحجم 5100 مللي أمبير وهتستحمل حوالي 8 ساعات شاشة مفتوحة يعني يوم كامل من الإستخدام .. انا بصراحة كان نفسي يستخدموا البطارية الأكبر الـ7000 بتاعت ميت باد 10.4.
المهم منفذ الشحن USB Type C والشاحن المرفق 10 واط والتابلت هيشحن في حوالي ساعتين ونصف.
الكاميرات :-
في التابلت بجميع انواعه الاقتصادية والمتوسطة عمومًا متسألش عن كاميرات ( الاداء بيبقا ضعيف ) .. ولما يكون تابلت اقتصادي شوية فده معناه أنك تنسى الكاميرات خالص ( الاداء فعلا ضعيف ) .. التابلت هنا بيجي بكاميرا خلفية 5 ميجا بيكسل وامامية 2 ميجا بيكسل وأداء الكاميرات متواضع جدًا وضعيف نوعا ما .
سعر التابلت :-
- النسخة الـ64 جيجا مع 3 جيجا رام من Matepad T 10s بسعر 4300 جنية
- النسخة الـMatepad T 10 العادي 32 جيجا مع 2 جيجا رام بسعر 3500 جنية
مميزات Matepad T 10s :-
- شاشة كبيرة FHD+
- صوت Stereo محترم
- خامات محترمة وتقفيل قوي
عيوب Matepad T 10s :-
- مفيش Face Unlock
- بطارية صغيرة
- سطوع الشاشة متواضع
وبالنسبالي الـT 10s صفقة أفضل من T 10 العادي .. هو أغلى 800 جنية لكن هيوفرلك شاشة بدقة أعلى مع مساحة أكبر.
لكن لو عايز تابلت Gaming بمعالج أقوى وبطارية أكبر وصوت أعلى و4 سماعات Stereo وتقدر تزود الميزانية لـ5700 جنية يبقى لازم تبص على Matepad 10.4 اللي راجعناه قبل كده.
ليست هناك تعليقات:
إرسال تعليق